Saturday, January 15, 2022

புரியாத பிரியம்.
.

நம்மில் எவரும் 
அவருடைய நேரம் வருவதற்கு முன்னர் 
மரணிப்பதில்லை.
மரணித்த ஒருவர் 
திரும்பி வரப்போவதுமில்லை.

நேசத்திற்குரிய ஒருவர் 
நிரந்தரமாகப் பிரிந்த பின்னர் தான் 
முழுமையான பெறுமதியை 
மனசு எப்போதும் உணர்கிறது.

இன்னும் அதிக நேரம் 
அவர்களுக்காகவும், 
அவர்களுடனும் 
செலவழித்திருக்கலாம் என்றும் 
ஆதங்கப்படுகிறது.
அவர் இருந்தபோதே
அவரது ஆசைகளில் ஒன்றையேனும்
நிறைவேற்றியிருக்கலாம்
என்றும் ஆசைப்படுது.

மீண்டும் ஒருமுறையாவது 
அவர்களது கண்களைக் காண்பதற்கோ,
அவர்களின் குரலைக் கேட்பதற்கோ 
இந்த உலகையே கொடுக்கவும் 
தயாராக இருக்கிறது.
ஆனாலும், 
இயலாத இயற்கை அது.

அற்ப உலக விடயங்களிலும்,
பேராசை துரத்தும் மரதன் ஓட்டத்திலும்,
பெயர், புகழ் என்ற மாயையிலும்
பிரிந்தும்,
கூடவே பெயரளவில் இருந்தும் 
வாழ்ந்துகொண்டுதான் இருக்கிறோம்.

குறிப்பாக,
நபியின் பொன் மொழிக்கமைய,
நேசத்திற்குறிய 
கணவன் மனைவி என்பவர்கள்
ஒருவரையொருவர் முழுமை செய்பவர்கள்.
இருவரில் ஒருவர் மரணிக்கும்போது 
தனது பாதி இதயத்தையும் சேர்த்துத்தான் 
மண்ணறையில் புதைக்கிறார் 
மற்றவர்.

எல்லாப் பிரிவுகளும்
மீள ஒருநாள் இணையும்.
ஒன்றில் இங்கே. 
இல்லையேல் அங்கே.

புரியாத பிரியம்.
பிரியும்போது புரியும்.
.
.
முஹம்மத்❤️ஸன்ஸீர்.
ரபிய்யுல் அவ்வல் 10, 1443, ஞாயிறு.

No comments:

Post a Comment