உள்ளத்தைக் ❤️ காயப்படுத்தாதீர்கள். (New ❤️)
தூய ❤️ உள்ளம் என்பது
இறைவன் இருக்கும் இடம் எனப்படுகிறது.
எந்த உள்ளத்தில்
இறைவன் இருக்கிறான் என்பதை
நாமறிய மாட்டோம்.
காயப்பட்ட உள்ளத்திற்கும்
இறைவனுக்கும் இடையில்
திரைகளுங் கிடையாது.
ஆதலால்,
எந்த உள்ளத்தையுங்
காயப்படுத்தாமல் இருப்பதே நல்லது.
வார்த்தை
கூர்மை மிகு ஆயுதமும் அதுதான்.
குணப்படுத்தும் மருந்தும் அதுதான்.
வார்த்தை பற்றியா சுவாரஸ்யங்களை
இன் ஷா அல்லாஹ்,
பிறிதொரு பதிவில் பார்க்கலாம்.
குறைந்தபட்சம்
முதல் 15 ஆண்டுகால வாழ்க்கை அனுபவங்களும்,
அவரவர் சமயம் போதிக்கும்
தர்மம், நீதி பற்றிய கல்வியும் சேர்ந்து
ஒரு மனிதனில்
சரியெது பிழையெதுவென்று
பிரித்துணரக்கூடிய அளவிற்காவது
உள்ளத்திற்கும் நஃப்ஸிற்கும் இடையிலான
உண்மைப் போராட்டத்தை உண்டுபண்ணக்கூடிய
மனச்சாட்சி என்ற ஒன்றை
உருவாக்கி இருக்கும் என்பது
எனது எடுகோளாகும்.
எனது ஆன்மாவுக்கு
அநியாயம் செய்துகொண்ட நான்
கெஞ்சிக், கண்ணீர் விட்டழுது
தொழுது மன்றாடி
இறைவனின் அன்பை வேண்டி
அவனிடம் மன்னிப்பைப் பெற்றுக்கொள்ளலாம்.
வாய்ப்பிருக்கிறது.
ஏனெனில்,
அவன் அளவற்ற அருளாளன்
நிகரற்ற அன்புடையவன்.
மன்னிக்கக் காத்திருப்பவன்.
ஆனால்,
நானோ நீங்களோ
இன்னொரு ஆன்மாவுக்குச்
செய்யும் அநீதியை, அதர்மத்தை அல்லது
அவரது உள்ளத்தைக் காயப்படுத்திய பாவத்தை
ஆண்டவனிடம் அழுது மன்றாடி மட்டும்
அழித்துவிட முடியுமா என்ன?
முடியாது.
பாதிக்கப்பட்டவரின் மன்னிப்பில் தான்
தனது மன்னிப்பின் கதவை வைத்திருக்கிறான்
இறைவன்.
சுபஹ் தொழுகையொன்றைத்
தவற விட்ட பாவத்தையும்
இன்னொருவர் கறும்பைத்
தெரியாமல் எடுத்துவந்த பாவத்தையும்
ஒரே விதத்தில்
சரி செய்ய முடியாது.
மகிழ்ச்சியான விஷயம் யாதெனில்,
மன்னிப்புக் கோரி மீண்டுகொள்ள
எனக்கும் உங்களுக்கும்
மறுமைநாள் வரை வாய்ப்பிருக்கிறது.
ஆனால்,
மறதி என்று வரும் என்றோ
மரணம் என்று வரும் என்றோ
நானும் நீங்களும் அறிய வாய்ப்பில்லை.
அதிலும்,
பாதிக்கப்பட்டவரின் மரணமோ
எப்பொதென்று தெரியாதே நிலையில்
நாமாக முந்திக்கொள்ள வேண்டும் அல்லவா?
ஒருவேளை,
நமது மரணம் முந்திவிட்டால்
இறைவன் நாடினால்,
நம்மால் பாதிக்கப்பட்டவர்
நமக்காக மனமிளகி
நம்மை மன்னிக்கவும் வாய்ப்புண்டு.
நம்மால் பாதிக்கப்பட்டவரின் மரணம்
நம்மை முந்திக்கொண்டால்
நாம் என்ன செய்வது?
நாளை மறுமை நாளில்
நமது நன்மைகளை நம் கண் முன்னே
கொத்துக் கொத்தாக அள்ளிக் கொடுத்தோ
கணக்கு தீர்க்க அவை போதவில்லை என்றால்,
அவரது தீமைகளை நாம்
அள்ளியள்ளி எடுத்துத் தான்
பாவத்திற்குப் பரிகாரம் செய்ய நேரிடும்.
நபியவங்க சொன்னதுபோல
மறுமை நாளில்
வங்குரோத்துக்காரர்கள் ஆகிவிடுவோம்.
மிகப் பெரிய நஷ்டமாக அது ஆகிவிடும்.
எல்லாம் வல்ல இறைவன்
நம்மைப் பாதுகாப்பானாக.
ஆமின்.
அதிகாரங்களால்,
பெருமையால், பொருளாதாரத்தால்
கல்வியால், காசு பணத்தால்
கௌரவத்தால் என்றெல்லாம் நம்மால்
நேரடியாகவோ, மறைமுகமாகவோ
மனம் நொந்தவர்கள்
எத்தனை பேர் இருக்கக்கூடும்?
மறைமுகமாகப் பாதிக்கப்பட்டவர்களை
எப்படிக் கண்டறிவது?
கஷ்டம்.
இனிமேலாவது
இன்னொரு ❤️ உள்ளத்தையேனும்
காயப்படுத்தாமல் கடந்து செல்வோம்.
.
.
முஹம்மத்❤️ஸன்ஸீர்.
16.01.2K22, ஞாயிறு.
படம்: Google
No comments:
Post a Comment