Thursday, January 20, 2022

மனசுக்குத் தான் ❤️
எத்தனை முகங்கள்.


பிறரிடம் பேசிப் பகிரப்படுவதை
ஒருவர் விரும்பாத அவரது குறையைப்
புறமாகப் பேசாதீர்கள்.
அவதூறுங் கூறாதீர்கள்.
என்றார்கள் முஹம்மத் நபி (ஸல்) அவர்கள்.
(ஸஹிஹ் முஸ்லிம் 2589)

ஏனாக இருக்கும் ... ?

சமீப காலமாக என்னையும்,
என்னைச் சார்தவர்களையும் சூழ
நிகழுகின்ற சம்பவங்களையெல்லாம்
ஒட்டுமொத்தமாக சித்தித்துப் பார்க்கும்போது
என் புத்திக்குப் புலப்படுவது இதுதான்.

ஒரு மனிதனின் புன்னகைக்குப் பின்னால்
உள்ளத்தில் என்ன ஓடுகிறது என்பதை
இறைவன் அறியத் தந்தாலேயன்றி
அதனை நம்மால் அறியவே முடியாது.
மனிதனின் உள்ளம்
ஒளிபொருந்திய மென்மையாகவும் இருக்கலாம்.
இருள் நிறைந்த மிருகத்தனமாகவும் மாறலாம்.
என்கிறபோது

நம்மிடம் ஒரு முகமும்
பிறரிடம் இன்னொரு முகமாய்
இருப்பவர்களை
எங்கனம் நாம் இனங்காண்பது?

சொல்பவர் நல்ல நண்பர்தான்
சொல்லப்படுவதும்
நமது நலனுக்காகத்தான் என்றாலும்
இன்னொருவரின்
பிறழ் நடத்தை பற்றிய தகவல்
புறமாக நம்மை வந்து சேருகிறபோது ...

அதை வைத்து ஷைத்தான்
அவருடனான நமது அணுகுமுறையை,
அவர் பற்றிய நமது மனப்பாங்கை மாற்றி
அவரது விடயத்தில்
நமது நற்பண்புகளை இழக்கச் செய்துவிடுகிறான்.
அதனால் தான்,
புறம் பேசாதீர்கள்.
புறம் பேசப்படும் இடத்திலும் இருக்காதீர்கள்
என்று சொல்லப்படுகிறது.
ஆனாலும்,
நாம் எவ்வளவோ பேசுகிறோம், கேட்கிறோம்.

ஒவ்வொருவருக்கும்
இறைவன் தான் நாடியதைக் கொண்டும்
தத்தமது கரங்களால் மனிதர்கள்
தேடிக்கொண்டதைக் கொண்டும் சோதிக்கிறான்.
அதிலே நாம் பொறாமைப்படுவதற்கு
எதுவுமேயில்லை.
என்பதைப் புரிந்துகொள்ள வேண்டும்.

ஒரு தீவிர முயற்சி
அல்லது தீராத ஆசை கொண்டதொரு ஆன்மா
முயன்றது கிட்டவில்லை என்றதும்
அதிலே வெற்றியை
இறைவன் தனக்கு நாடவில்லை என்றோ,
அந்த முயற்சியிலே
தான் கற்றுக்கொள்ள எதையோ
தனக்காக வைத்திருப்பான் என்றோ
எடுத்துக்கொள்வதில்லை.
மாறாக,
ஷைத்தானின் தூண்டுதலினால்
தோல்வியுணர்ச்சியும்,
பொறாமையும், காழ்ப்புணர்ச்சியுங் கொண்டு
பேசியும், சேறு பூசியும் தட்டலைகிறது.

மேன்மக்கள்
பதவிகளை விட்டு விரண்டோடியது
கேள்வி கணக்கிற்குப் பயந்துதான்.
இப்போதெல்லாம்
பயப்படவேண்டி இருக்கிறது.
எண்ணம் தூய்மையாக இருந்தால்
இறைவன் பாதுகாப்பான்.

இப்போதெல்லாம்
எவர் மனதில் என்ன ஓடுகிறது
என்பதை அறிய முடியாமல்
பேசுவதற்குக் கூட பயமாக இருக்கிறது.
வார்த்தைகளை வெகுவாகக் குறைத்தும்
வேண்டாத தகவல்களை
விட்டு வெகுதூரம் விலகியும் இருக்கவே
விரும்புகிறதென் மனசு ❤️

குறையும், புறமும்
பேசித் திரிபவர்களுக்குக் கேடுதான்
என்கிறான் அல்லாஹ்.
(அல்ஹுமஜா 104:1)
.
.
முஹம்மத்❤️ஸன்ஸீர்.

20.01.2K22, வியாழன். 

No comments:

Post a Comment