Saturday, January 22, 2022

வார்த்தைகள் ❤️


வார்த்தைகள் 

ஒருவரின் அடையாளம்.


தோல்வியடைந்தவன்

என்பவனின் புன்னகை

தோற்கடித்தவன் 

என்பவனின் மகிழ்ச்சியைத்

தின்று விடுவதைப்போல

மௌனமும் பலமானது தான்.

"புன்னகை"

மௌனத்தின் மலர்.


ஒருவரின் ஆளுமை

அவர் என்ன பேசுகிறார் 

என்பது மட்டுமல்ல.

மௌனத்தை எவ்வாறவர் 

முகாமைத்துவம் செய்கிறார் 

என்பதுவும் தான்.

சிலரது மௌனம்

அவரது பேச்சாகவே ஆகி விடுகிறது.


பேச்சைப் போலவே,

ஒன்று குறைவாக வெளிவருது என்றால்

அங்கே நிறைய இருக்கிறது 

என்றும் ஆகும்.

ஒன்று நிறைய வெளிவருது என்றால்

அது நிற்கப்போகுது என்றும் ஆகும்.


மனிதர்கள் 

அதிகம் பேசுகிறார்கள்.

அதிகம் பேசும்போது 

புறம், அவதூறு 

மனதை ❤️ நோகடித்தல் 

போன்ற பாவங்களும் 

அதிகம் நேர்ந்து விடுகின்றன.


அதிகம் பேசுவதைக் கூட

ஆளுமை என்று நினைக்கும் பிரம்மை

நமக்குள் வேரூன்றி இருக்கிறது.

ஐந்து வயது வரை 

பேசு மகனே ! பேசு மகளே !

என்று கொஞ்சுவதும், கெஞ்சுவதும்

அதன்பின்

வாயை மூடு. வார்த்தை ஜாஸ்தி என்று

வரையறை போடுவதும்

அதே மனிதன் தான்.


--------------------------------------------------

தான் கேட்பதையெல்லாம் நம்புகிறவனுக்கு

மூளை என்பது அவசியமில்லை.

அவனது நாவே 

அவனுக்குப் போதுமானது.

---------------------------------------------------

இதனைக் 👆 கொஞ்சம் 

யோசித்துப் பாருங்க.


வார்த்தைகள் வலிமையானவை தான் 

இல்லையென்றால்,

பச்சைப் பொய்களைக் கூட 

நம்மை நம்ப வைக்குமா?

ஆனாலும்,

உண்மையான வார்த்தைகளில்

உண்மை ஒருநாள் 

சூரியன் போல எழுந்து நிற்குபோது

பொய்கள் எல்லாம்

பொலபொலவென்று உயிரற்றுப் போய்விடும்.


எவ்வளவோ சிரமங்கள் என்றாலும்

என்னோடு தாங்கிக் கொள்கிறேன்.

எவரிடமும் நான் முறையிடுவதில்லை.

என்று சொல்லி விட்டாலே ....

அதுவொரு முறைப்பாடு தான்.

வார்த்தையின் 

வலிமையைப் பார்த்தீர்களா?


மனசு ❤️ இருக்கிறதே

அதுவொரு பெரும் வரம்.

நல்ல வார்த்தைகள் 

நல்ல விதைகள் மாதிரி.

போட்ட உடனேயே முளைக்காது.

பொறுமையாக இருக்கணும்.

மனதில் விழுந்த வார்த்தைகள் 

முளைக்கும்.


உள்ளத்தில் உதிக்கும் வார்த்தை

எந்த வாளை விடவுங் கூர்மையானது.

உச்சரிக்கும் முன்னர்

உள்ளத்தோடு போரிட்டு

பொருத்தமான வார்த்தைகளை மட்டும்

விடுதலை செய்யுங்கள்.

இல்லையேல்,

மௌனம் மிக மேலானது.


"பின்னர் ஒரு கணம்

மனம் வருந்தி

மன்னிப்புக் கோர நேரும் விதத்தில்

இப்போது பேசி விடாதீர்கள்" என்பது

முஹம்மத் நபி (ஸல்) அவர்களின் ஆலோசனை.

.

முஹம்மத்❤️ஸன்ஸீர்.

21.01.2K22, வெள்ளி.

No comments:

Post a Comment