Saturday, January 15, 2022

கண்ணீரில் சமைத்த உணவும் 

ஹலாலான கவளத்தின் குணமும்.


(புரிதல் என்பது, 

மொட்டொன்று மலர்வது போல மெதுவானது.

சுகப் பிரசவம் போல ஆனந்தமானது.

ஆதலால், கொஞ்சங் கவனமாக வாசியுங்கள்.)

.

(உன் பாவங்களை நினைத்து)

இதயத்தின் (தகிக்கும் துயரத்தின்) நெருப்பாலும்,

கண்ணின் நீராலும் 

(ஆன்மாவிற்கான) 

நல்லுணவைச் சமைத்துக்கொள்!

மேகத்தாலும், சூரியனாலும் தான் 

தோட்டம் திறந்ததாக (மலர்கள் மலர்வதாக) ஆகும். 


கண்களின் தண்ணீரின் ருசியை 

நீ எங்கே அறிவாய்!

நீதான் குருட்டு (பிச்சைக்கார) மனிதர்களைப்போல 

ரொட்டிப் பிரியனாக அலைகிறாயே!

(உன் உள்ளம் எனும்)

ஜோல்னாப் பையிலுள்ள ரொட்டியை 

நீ காலியாக்கினால், 

அதனைப் புகழ்மிக்க ரத்தினங்களால் 

நிறைத்துக்கொள்ள முடியும்.


உன் ஆத்மாவெனும் சிசுவை 

ஷைத்தானின் முலைப்பாலில் இருந்து அப்பாலாக்கு; 

பின்னர் அதனை 

அமரரோடு உரையாட விடு!

நீ முகங் கறுத்துக் குழம்பியவனாக இருந்தால் 

ஷைத்தான் குடிக்கும் முலைப்பாலையே 

நீயுங் குடிக்கிறாய் என்பதையுணர்!


அதிக ஒளியும், 

பூரணத்துவமும் தரும் (உணவுக்) கவளம், 

ஆகுமான சம்பாத்தியம் மூலம் கிடைத்ததாகும்.

ஆகுமான கவளம் உணவால் 

அறிவும், ஞானமும் உண்டாகின்றன; 

ஆகுமான கவளத்தால் 

அன்பும், மெல்லிதயமும் உண்டாகின்றன.


ஒரு கவளம் சோற்றில் 

நீ பொறாமையையும், பித்தலாட்டத்தையுங் காண்பாயாயின் 

அதுகொண்டு, 

அறியாமையையும், மௌட்டீகமும் உருவாகக் காண்பாயாயின் 

அது விலக்கப்பட்டது (ஹராமானது) என்று அறிந்துகொள்.


நீ கோதுமை விதைத்தால் 

அதிலே பார்லியா விளையும்?

குதிரையானது 

கழுதைக் குட்டியை ஈனக் கண்டதுண்டா?


(ஆகுமான) கவள உணவு வித்தாகும்;

சிந்தனைகள் அதன் கனிகளாகும்.

(ஆகுமான) கவள உணவு கடலாகும்;

சிந்தனைகள் அதிலே கிடக்கும் முத்துக்களாகும்.


ஆகுமான கவளத்தால் 

(இறைவனுக்குச்) சேவை செய்ய வேண்டும்,

நல்ல வணக்கம் புரிய வேண்டும் என்ற எண்ணமும்,

மறு உலகம் (சுவர்க்கம்) புக வேண்டும் 

என்ற உறுதியும் உண்டாகும்.

.

.

மௌலானா ❤️

ஜலாலுத்தீன் ரூமி (ரஹி).


11 ரபிய்யுல் அவ்வல் 1443, திங்கள்.

No comments:

Post a Comment