உயிருள்ள ❤️ பிரார்த்தனை.
"பிரார்த்தனை ❤️"
தொழுகையில் வரும் சூரா ஃபாத்திஹா போல ..
இறைவனுக்கும் ஆன்மாவுக்கும் இடையிலான
மிக அழகான சம்பாஷனை அது.
சர்வ வல்லமை பொருந்திய ஒரு சக்தியின் முன்னால்
ஒன்றுமேயில்லாதவனாக நிற்கும் தருணம் அது.
உயிருள்ள பிரார்த்தனை செய்யும் உள்ளம் ❤️
அமைதியான இடமொன்றில்
அமைதிதேடி அமரும்.
பிஸ்மில்லாஹிர் ரஹ்மானிர் ரஹீம் எனும்
அல்லாஹ்வின் 99 திருநாமங்களின் நினைவுடன் ஆரம்பிக்கும்.
அவனது வல்லமைகளைக் கொண்டு
அவனை அதிகமதிகம் புகழும்.
நபிகள் நாயகம்
முஹம்மத் ஸல்லல்லாஹூ அலைஹி வஸ்ஸல்லம் மீதும்
அவர்களின் குடும்பத்தின் மீதும்
சலவாத்துச் சொல்லும்.
உயிருள்ள பிரார்த்தனை செய்யும் உள்ளம் ❤️
அவனைப் புகழும்.
முகஸ்துதிக்காகவன்றி மனதாரப் புகழும்.
பிற மொழியில் புகழ்வதாயின் பொருள் உணர்ந்து புகழும்.
அடியான் புகழுவதை இறைவன் விரும்புகிறான்.
ஆனாலவன் எந்தத் தேவையுமற்றவன்.
அதன்மூலம் அவனது அடியான்,
கடுகளவுந் தற்பெருமை அற்ற
உள்ளங்கொண்ட ❤️ ஒருவனாக மாறுவதையும்,
அவனது சுவனத்திற்குத் தகுதி பெறுவதையுமே
அவன் விரும்புகிறான்.
அவன் அளித்திருக்கும் ஆயுள், ஆரோக்கியம் போன்ற கொடைகளுக்காக
மனதார நன்றி கூறும். கண்ணீர் மல்க நன்றி கூறும்.
மனதார நன்றி கூறும் உள்ளத்தில் இருந்து
இயல்பாகவே கண்ணீர் ஊற்றெடுத்துப் பெருகி ஓடுமல்லவா?
அல்லாஹ்வின்
அழகிய திருநாமங்களைக் கொண்டு அழைக்கும்.
அதையே அவன் தனது திருமறையிலுங் கூறியிருக்கிறான் (17:110).
அடியானின் உள்ளத்திலுள்ள அனைத்தையும்
அவன் நன்கறிவான்.
அவன் பஷீர் (பார்ப்பவன்), சமீஃ (செவிமடுப்பவன்.)
இருப்பினும் அவனிடம் ஒவ்வொன்றாக ❤️ எத்தி வைக்கும்.
தந்தையிடம், தாயிடம் கேட்பதை விடவும்
பலமடங்கு சுதந்திரமாக அவனுடன் பேசும்.
அவன் நிகரற்ற அன்புடையவன்.
அவன் அளவற்ற அருளாளன்.
கேட்காமலேயே அள்ளியள்ளித் தந்துகொண்டிருபவன்
கேட்கப்படுவதில் நலவிருந்தால்,
கேட்கப்படுவதை அவன் நாடியிருந்தால் தராமல் இருப்பானா?
கேட்க வேண்டும் என்பது தான்
அவன் வகுத்த வாழ்வின் விதியாக இருக்கிறது.
உயிருள்ள பிரார்த்தனை செய்யும் உள்ளம் ❤️
அவன் அருள் புரிந்த வரலாறுகளை, நபிமார்களை,
ஸஹாபாக்களை, நல்லடியார்களை நினைவுகூரும்.
அவன் தண்டித்த சமூகங்களையும்,
அற்ப மனிதர்களையும் அவனிடம் நினைவுகூரும்.
அதுபோலத் தன்னையும் சோதித்து விடாதிருக்க
இறைவனிடம் இறைஞ்சும்.
அற்ப உலகில் கிடைத்திருக்கும் சொற்ப கால வாழ்கையில்
செய்த தவறுகளை மனதார உணர்ந்து
அவனிடம் மன்னிப்புக் கேட்கும்.
மன்னிப்பதில் இறைவன் மகா கருணையாளன்.
தெரிந்து செய்த தவறுகளைக் குறிப்பிட்டு மன்னிப்புக் கேட்கும்.
தெரியாமல் செய்த பாவங்களுக்காகவும்
அவனிடம் மன்னிப்புக் கேட்கும்.
தனக்காக
எதையுமே சுயமாகச் செய்துகொள்ள இயலாத
பலவீனத்திலேயே மனிதன் இருக்கிறான்.
இறைவனின் நினைவும், நன்றியுணர்வும்
நிறைந்த உள்ளத்தின் மூலமே
மனிதனின் ஆன்மா மகத்தான பலம் பெறுகிறது.
ஷைத்தானின் கட்டுப்பாட்டில் இருக்கும் ஒருவன்
பேரழிவைக் கொண்டுதரும்
போலியான பலத்தையே பெறுகிறான்.
அதுவும் இறைவனின் நாட்டப்படிதான் நிகழ்கிறது.
ஷைத்தானின் தீங்கை விட்டும் ❤️ அவனிடமே பாதுகாவல் தேடட்டும்.
உயிருள்ள பிரார்த்தனை செய்யும் உள்ளம் ❤️
செய்த பாவங்களின் முழுப்பொறுப்பையும்
மனதார ஏற்று அவனிடம் பாவமன்னிப்புக் கேட்கட்டும் (7:23)
அவனுக்கு முற்றிலும் வழிப்பட்ட நிலையிலேயே
தனது ஆன்மாவைக் கைப்பற்றுமாறுங் கேட்கட்டும் (7:126)
எதை பற்றித் தனக்கு ஞானம் இல்லையோ
அதை அவனிடங் கேட்பதை விட்டும் அவனிடம் பாதுகாவல் தேடட்டும் (11:47).
உலகம் சார்ந்த
அத்தியவசியத் தேவைகளோடு மட்டும் நிறுத்தி விடாமல்
மறுமை சார்ந்த உயர் நிலையையும் வேண்டி நிற்கட்டும். (2:201)
பரிசுத்தமான சந்ததிகளையே அவனிடங் கேட்கட்டும் (3:38)
சுவனத்தை விடவும்
நரக நெருப்பிலிருந்து முழுமையான பாதுகாப்பையே அதிகம் வேண்டட்டும். (3:16)
நேர்வழியையும்,
நெறி தவறாத உள்ளத்தையுங் கேட்கட்டும் (3:08)
நபி முஹம்மத் ஸல்லல்லாஹூ அலைஹி வஸ்ஸல்லம் மீது
சலவாத்துச் சொல்லி நிறைவை நெருங்கும்.
அல்லாஹ்வை மனதாரப் புகழ்ந்து,
நன்றிகூறி நிறைவுசெய்யும்.
ஈற்றில் அந்த மனசு
மகத்தான அமைதி பெற்றிருக்கும்.
அல்ஹம்துலில்லாஹ் ❤️
.
முஹம்மத்❤️ஸன்ஸீர்.
05.11.2K21, வெள்ளிக்கிழமை.
No comments:
Post a Comment